Friday, April 28, 2006

فرجات آخر الشهر

* من حق كل مواطن من موقعه الخاص أن يشيل الواوا أح تمهيداً للانتقال لـ"الفكر الجديد" ، في 2011!

* في حلقة الأربعاء الماضي من برنامج القاهرة اليوم طلب عمرو أديب ضمناً من جمهور القاهرة اليوم أن يطلب من المغنيين الشباب الذين كانوا في ضيافته وقتئذ طلب أغاني وطنية ، أنا شخصياً مش فاهم ليه وعلى إيه ، هل علشان يحرج المغنيين الشباب - وبالمناسبة همة كانوا أيات فاروق والرائعة رحاب مطاوع وواحد مش فاكر اسمه وهمة أصوات مثقفة ومحترمة بحق وحقيقي - ولا علشان يورينا فلس التراث الغنائي الوطني في مصر واللي كله طنطنات مالهاش أي معنى؟.. وبالنسبة للمشاهدين.. مين فيهم فاكر أغنية "قلب الوطن مجروح" للكنج منير ، واللي غناها على أثر أحداث مشابهة لأحداث اسكندرية؟.. تفتكروا عمرو نفسه فاكرها، أو عارفها أصلاً؟..

بصراحة .. أرفع القبعة لمنير ، أصفق لضيوف عمرو أديب.. أما عمرو أديب نفسه.. هارد لك.. طلعت آوت!

*أماني الخياط ، مذيعة النيل للأخبار التي انتقلت حديثاً لقطاع الأخبار ، لم تقدم أي إضافة تذكر على الإطلاق منذ مجيئها للقطاع ، اللهم إلا نبرة الصوت العالية فحسب .. الأمر الذي يثير التساؤل حول المدائح التي يكيلها الصحفيون لمذيعي تلك القناة خاصة من صاحبوا رئيستها الأولى سميحة دحروج.. إلى هؤلاء الصحفيين .. بصوا شوية للحقائق ولا تعاملوننا كشوية حمير..

*كلما أشاهد القاهرة 30 ، أخرج بانطباع : أن نجومية حمدي أحمد تأخرت لعقود بسبب عدم ظهور مخرج يفهمه.. في الوقت الذي يشكل فيه ممثلون أقل موهبة المخرجين والجهات الإنتاجية على إيديهم!

*يعجبني وعي نصر محروس ، فالواد اللي كان "لسة صغير" في "السح الدح امبوه" كبر دلوقت .. وبقى "قلبه بيوجعه" و "عايز حد يدلعه"!

*لولا حادث دهب الإرهابي لما حصل دم الغزال على جائزة في مهرجان الفيلم الروائي .. هذه وجهة نظري..

*عندما تبث فضائية خاصة خليجية أن مسابقة ام بي سي لاختيار شبيه العندليب كلام فارغ ، وأن عبده شريف المطرب المغربي هو من سيقوم بدور عبد الحليم في المستشفى .. أدرك أن المنافسة الشريفة بين القنوات وبعضها قد ذهبت إلى غير رجعة ، وإن المهنة خلاص يا عالم .. للأهبل والغشيم!

*يقال أن هناك تطويراً في القناة الفضائية المصرية في شهر مايو ، وأخشى أن يتم تأجيله إلى شهر ما...يولية!

*مبروك لتامر أمين ديك البرابر تخلصه من فرخة مزعجة ، لكن ربنا يستر عليه من الفرخة اللي جاية!

*عمرو عبد السميع يصلح للتمثيل في intro النسخة الجديدة من لعبة tekken على البلاي ستيشن .. رشا مجدي آخرها تظهر كومبارس في نفس الإنترو!

*أخيراً.. أصالة اتجوزت طارق العريان ، وقالت قبل كدة أنها مش حتتجوزه للتمويه ، في التليفزيون اتكلموا عن الحادث الإرهابي في دهب ، وقالوا في الأول إنه عملية ناسفة للتمويه ، والمجرم ركب قطر اسكندرية والمخبر ركب قطر أسوان.. برضه للتمويه!

Thursday, April 27, 2006

ليس دفاعاً عن الست نيرفانا

لا أكتب هذه السطور دفاعاً عن المدعاة نيرفانا إدريس ، فرأيي فيها معروف ، ولي فيها أكثر مما قال الإمام مالك في الخمر ، لكن يبقى إحقاق الحق..وقولة اللي لينا واللي علينا..

نيرفانا إدريس دخلت ماسبيرو ، وأثارت جو كبير من الكراهية والحقد الأسود عليها من قبل مذيعات ماسبيرو ، الحقد دة يمكن يكون سببه طبيعة وتركيبة نيرفانا إدريس كبني آدمة ، أو المبلغ اللي بتاخده على قلبها في الشهر ، لكن صدقوني فيه سبب تاني .. سبب تاني خالص أنا شايفه أهم..

نيرفانا إدريس جت من ثقافة تانية خالص غير ثقافة ماسبيرو ، اشتغلت كتير في قناة الأوربيت ، الأوربيت مهما قلنا عن القيود غير المرئية اللي بتحكمها برضك قناة حرة ، بتشتغل بشكل احترافي ، بطقم فني عالي بحق وحقيقي ، وبتتمتع بجرأة في تناول قضايا هي من المحرمات في دولة ماشخيرو العظمى ، نيرفانا نجحت في القناة دي قبل ما يركبها داء الغرور المميت ، وقبل ما تخرف التخريف اللي حصل على خلفية انتخابات الرئاسة ، واللي خلى كل الناس تتفق على كراهيتها مهما اختلفوا على اللي صوتوله أو اللي ما صوتولهوش في الانتخابات..

الثقافة الجديدة دي بتحترم النجم ، ونيرفانا جت التليفزيون وهي مشهورة ونجمة ، أياً كان الخلاف على شخصها ، طبيعي النجم في الثقافة الاحترافية ياخد فلوس أكثر .. ولا يمكن مقارنة راتب رونالدينهو وزكي تَتَّح حتى لو الاتنين لعبوا في نادي واحد ، دة في نظام احترافي صح..

نيجي بقى نشوف على الطرف الثاني ، مين اللي أشعل الحرب على المذيعة إياها ، ومين اللي "صَيَّح" ولم الصحافة وعملها حلوانة في سلوانة..

جاسمين طه زكي اللي عملوا مناحة علشان طفشت وسابت البيت .. دي إحدى مذيعات الواسطة اللي نطت على ماسبيرو بالبراشوت ، أهم برنامج قدمته قبل البيت بيتك كان أوسكار ، خلفاً لسناء منصور .. والبرنامج في وجودها فقد الكثير من بريقه.. لما اختيرت في البيت بيتك ثارت علامات استفهام ، ولما تركت البيت أصبحت تُشاهَد في الأخبار في تغطية لأنشطة السيدة الأولى.. ونعم العقوبة!

ياسمين عبد الله ، مذيعة في الفضائية ، اشتهرت بمظهرها الاسترجالي وبرنامج الأبراج ، التي كانت تقدمه على الغير مأسوف عليها الفضائية المصرية قبل أن يعاد تقديمه بصورة أخرى على قناة دريم .. عملت لبعض الوقت في برنامج صباح الخير يا مصر قبل البيت بيتك..ومن أشهر إنجازاتها المهنية تقديم حفل افتتاح قرعة كأس الأمم الأفريقية!

تامر أمين ، أو لنقل اسمه ثلاثياً : تامر أمين بسيوني .. وكأن تامر دائماً مرادف للواسطة فيكي يا بلاد العجائب (تذكروا الممثل التحفة تامر عبد المنعم ابن رئيس مجلس إدارة روزا اليوسف سابقاً)..بدأ مشواره في النيل للأخبار قبل ظهوره في نشرات قطاع الأخبار ودخوله البيت .. يتمتع بشعبية سلبية (بكراهية يعني) تنافس شعبية نيرفانا السلبية بالضبط ، والسبب هو خروجه أحياناً عن النص ، والقيام بدور محامي الحزب الوطني بشكل فج..

مشكلة الثلاثة وآخرين في ماشخيرو بسيطة .. وهي أنهم وصلوا لدرجة من الغرور والتضخم جعلتهم لا يتصورون أنه يوجد على ظهر هذا الكوكب غيرهم ، فالجزيرة قناة تهييج ، والعربية شرحه ، وام بي سي شوية تحف ، وال بي سي المتحالفة مع الحياة اللندنية دول محدش عارف لهم شكل ولا طعم ولا لون .. الاحتراف بدعة وكل بدعة ضلالة.. ولا تليفزيون إلا ماسبيرو.. وجولدي هو التكنولوجيا واللي مش عاجبه يخبط راسه في أقرب حيطة..

ما دام ذلك كذلك .. أهو جت لهم لحد عندهم واحدة غيرهم ، من ثقافة مهنية تانية ، تقدر تعمل اللي بيعملوه ، وتتفوق عليهم حتى في مسح الجوخ والنفاق المزمن..يسكتوا لها؟

حرب الثلاثي المرح وشركاه على الست نيرفانا أشبه بشخصية إلهام شاهين في مسلسل "بنت أفندينا" .. فتاة "الحظيرة" اللي عجبت الباشا فاتجوزها فحسبت نفسها على الطبقة الأرستقراطية وكأنها مولودة أرستقراطية ، وحاربت بشراسة كل اللي هددوا مكاسبها اللي حصلت عليها بمجرد جوازة..

نيرفانا ليست ملاكاً ، ولكن ما ألعن من سيدي إلا ستي..
آخر سطر :
لو منى الشاذلي جت ، حتعامل نفس المعاملة ، وحتستقبل نفس استقبال خالد بيبو بالفانلة الحمراء في الإسماعيلية!

Tuesday, April 25, 2006

طوبة على طوبة.. خلي العركة منصوبة

أي صحفي عايز يخيل ع الجزيرة والعربية وغيرها من القنوات ، بحجة إن فيها الضيوف بيتخانقوا وهاين عليهم يمسكوا الترابيزات وهات يا ضرب في بعض ، يخسأ كدة زي الشاطر ويقعد في بيتهم!

بكل أسف ، أقول والكسفة تغطي ملامح وشي ، إنه في برامج مصرية ، ضيوفها مصريين ، مذيعينها ومخرجينها من حاملي الجنسية المصرية ، بيحصل دة وألعن.. والأنكى إنه يا تلاقي مقدم البرنامج نازل تصييح علشان يأكد إن مفيش ديك في الأستوديو غيره ، زي هالة سرحان ، أو إن دوره هو تهدئة النفوس ، زي عمرو أديب..

عمرو أديب امبارح كان شكله وحش وبائس في حلقة القاهرة اليوم ، لما وجد الجمهور نفسه على موعد مع "شَكْلَة" من بطولة اللواء عبد الوهاب الهلالي الخبير الأمني ، والخبير في دراسة الجماعات المتطرفة والفكر الإرهابي ضياء رشوان..

الأخير وجد نفسه وقد تنطبق عليه المقولة التاريخية لماجدة زكي في مسلسل الحاج ميتو : تلاتة على واحد يا دوب ، أربعة على واحد حرام ، أربعة همة الهلالي ومحمد صلاح "مدير مكتب الحياة" والصحفي أحمد موسى "الشهير بالسوسة الدقرم" وعمرو أديب .. والظاهر إن ضياء مش خبير في الفضائيات زي خبرته في الجماعات ، بدليل إنه نسي إن فيه ضيوف في بعض البرامج بيتعملوا "مسخة الحلقة" على إيد المذيع وبتواطؤ بعض الضيوف بما إنه والعياذ بالله صاحب الرأي المخالف.. ودخل الخية برجليه في خناقة جانبية مع محمد صلاح وأحمد موسى ، لغاية ما جت الطوبة في المعطوبة ، وطلب من اللواء الهلالي وضياء رشوان - المسكين فعلاً- الإدلاء بالرأي حول المسئولية السياسية عن الأحداث ، وما أن حمل ضياء رشوان المسئولية لوزارة الداخلية .. حتى بدأت المشاجرة الكبرى..

قال اللواء على الهواء أن ما قاله رشوان "كلام هجايص" .. ومحمد صلاح بيضحك وهاين عليه يسخسخ.. وقال اللواء لا فض فوه ما معناه لضياء رشوان : انت معاك مؤهل إيه.. فيقول له الأخير : بعد الحلقة حقولك.. كل دة وتدخل عمرو وأحمد موسى "محدودن محدودن يااااا ولدي"..أماال.. إحنا جايين نهدي النفوس..

وبعد جهد جهيد ، وبعد أن خرجت القصة والرواية عن الـfull control.. نجح عمرو أديب بعد فوات الأوان في فصل القوات المتنازعة بعد ما خد فاصلين مش فاصل واحد ..

إيه اللي نخرج بيه من "السين" اللي اتعمل دة؟

بيبقى المذيع غير موفق لما الأمور تخرج عن قيد السيطرة قدامه ، ويبان شكله وحش طحن قدام الملايين من المشاهدين..المشاكل دي لازم تتحزم من أولها .. وعلشان ما أرميش كل شيء على أديب ومحمد صلاح ، كان من الممكن من اللواء الأكبر سناً وقدراً ومقداراً أن يمتص ضياء رشوان بشكل أفضل.. أما ضياء فرغم حدته إلا إن كل العذر يلتمس ليه بعد ما لقى كل الحلقة مقلوبة عليه وكإنه متورط في العمل الإرهابي..
ولإني جاي أهدي النفوس بجد ، فحفترض إن عمرو أديب نيته كويسة ، مش زي ناس تانية بتذيع في روتانا سينما والإيه آر طين تؤمن بأنه علشان البرنامج يبقى ناجح لازم نحط طوبة على طوبة لجل العركة تفضل منصوبة!

Friday, April 21, 2006

تفتكروا السجن للجدعان؟

أصبح تامر حسني أشهر مسجون في مصر ، وربما أكثر شهرة من أيمن نور ، وصيف انتخابات الرئاسة والسياسي المشاغب والمثير دائماً للجدل ، رغم أن أخبار "نور" في السجن وإضراباته وأصداء محاكمته لا تزال تحتل ترتيباً على شريط الأخبار في المحروسة ، واحتكموا بقى بالأمارة للريبورتاج الهايل اللي عملته نورهان كامل في موقع في البلد.. واللي تضمن وجهات نظر باعة الكاسيت اللي مش عارفين يلاحقوا على مبيعات شريط أشهر هارب من التجنيد في مصر!

المثير للتساؤل والدهشة هو كم التعاطف الهائل حول تامر حسني ، والذي من صوره ما نشرته جريدة عين عن قيام بعض معجبات تامر حسني من الطبقة الهاي بقيادة حملات للتضامن مع المطرب.. بل ووصل الأمر لقيام مظاهرة في مدينة نصر للتضامن معه.. كما لو كان زعيماً سياسياً....أما الصحف فتفننت في معظمها في إظهار "تامر" كضحية لمؤامرة دبرها ضده مطرب شهير..

ليه التعاطف دة وعلى إيه؟

المطرب المحترم اتسجن بجلالة قدره بتهمة اعترف وأدين بها قضائياً ، مش في قضية يا عالم إن كان عملها ولا ماعملهاش، كمان مش أي تهمة ، دة هروب من الجيش في قالب تزويري!.. لكن فيما يبدو فإن الهروب من الجيش من وجهة نظر جمعية مشجعي تامر حسني مش جريمة ومش غلط أصلاً ، أمال لو فكره في اللي قاله الناقد ماجد حبتة في مقال رائع مش موجود على سايت جريدة الأسبوع حالياً ما معناه إن المطرب المحترم بتاع الأغاني الوطنية اتهرب من خدمة الوطن اللي غنا ليه!.. يعني مزور جنائي وفني في نفس الوقت..

اللي حصل دة رخصة فيما يبدو لأي شخص عنده قبول من الجمهور الهاي ، خصوصاً البنات ، إنه يعمل أي حاجة وكل حاجة ، وحيلاقي ألف من يمشي له في مظاهرة ، حتى ولو ما مشاش في أي مظاهرة في حياته علشان حاجات أهم ألف مرة...

مبروك لتامر السجن ، هو مش بس يستحقه ويستاهله ، دة استفاد منه استفادة كبيرة ، دة غيره ، على سبيل المثال بهاء سلطان صاحب شعار المرحلة "قوم اقف وانت بتكلمني" نسج حوالين نفسه إشاعة مضروبة استفاد منها استفادة كبيرة وزودت مبيعات ألبومه "3 دقايق" اللي قبل "قوم أقف".. تامر - المحظوظ- جت له فضيحة بحق وحقيقي .. حتشهره أكتر وأكتر.. وحيطلع من القصة دي ولا عمرو دياب في زمانه!

كفارة مقدماً .. ويا ما ع البرش مشاهير .. مظاليم بقى ولا مش .. ما عادتش تفرق..ما دام ليك جمهور .. تبقى ممن ينطبق عليهم القول الغريب وغير المفهوم : السجن للجدعان!

تفضل حاجة أخيرة :
هذا التعاطف العمياني مش موقف كل الشعب المصري من تامر حسني.. بدليل إن واحد في الشغل شاف زميل ليا مشغل أغنية لتامر حسني .. فقال لزميلي بالحرف الواحد تقريباً : شغل لنا أي حاجة غير الواد الهربان من الجيش دة..

استفتاح

هذه التدوينة مجرد استفتاح.. للآتي بعد..
المدونة دي تقدروا تقولوا كدة متخصصة في شئون المزيكا والسينما والدراما التليفزيونية والفضائيات..تصدر حسب التساهيل ، وحسب المشاهد الغريبة اللي بنشوفها على الساحة الفنية واللي تستاهل الفرجة على حق..
والعبد لله في انتظار فرجاتكم وملاحظاتكم.. وكلها ستلقى مني بعون الله كل عناية وبحلقة..