Saturday, June 03, 2006

"كاس" وفاضي!

أكتب هذه السطور قبل أيام معدودة من انطلاق كأس العالم بألمانيا البطولة التي تمثل حدثاً فريداً لم يسبق له مثيل في تاريخ هذا الشعب ، فهي المرة الأولى التي يحرم فيها الشعب ذو الأغلبية الكروية المتعصبة في كل اتجاه من مشاهدة لعبتهم المدللة ، التي تنسيهم كثيراً من عبثية الحياة والسياسة في هذا البلد العجيب..

لقد كانت تلك صدمة ، فبعد أن كان المواطن يرتب أمور حياته على مشاهدة الحدث الأهم كروياً على مستوى العالم ولا يتكرر إلا مرة كل أربع سنوات ، صار عليه أن يبحث عن وصلة تجعله يشاهد المباريات ولو بإرسال مشوش (أهو أحسن من مفيش)..أو يقف ضمن الطوابير على المقاهي لمشاهدة المباريات ، أو يبحث عن أقرب شاشة من شاشات الحزب التي نصبها فقط لتحسين صورته وليس حباً في الكرة ولا في أي شيء مستدير حتى لو كان بطيخة..

وبالتأكيد سيلقي باللائمة على الشيخ صالح كامل رجل البر والإحسان والتشفير والاحتكار ، هذا الرجل الذي يتضح لنا في كل يوم أنه ليس مجرد رجل أعمال قدر ما هو شخص يعاني من عقدة ما لها علاقة بمصر (رغم زواجه من مصرية) ، فلو كان يريد التشفير للمال لأغلق باب مفاوضات اللحظة الأخيرة مع التليفزيون المصري وغير المصري..وهو ما لم يفعله..

كما سيلقي المواطن باللائمة أيضاً على الإعلام الرسمي ، فهو أولاً عوده على هذا الداء المهبب ، وجعل كرة القدم كيفاً بعد الشاي ، ثم سلم -الإعلام الريادي- النمر للشيخ صالح كامل ، وقدم له عدداً من التنازلات ، ثم عاد ليقوم بدور "أب أحمد" على رأي أهل اسكندرية ويتشطر على رجل المستحيل (=الذي يحتكر ما يريد ويجعل مشاهدته "مستحيلة")، لا من أجل كرامة الإعلام الوطني وإنما لحسابات سياسية..

ثم تأتي الأخوات المذيعات الفاضلات في برنامج فاشل كـ"وسط البلد" ليعربن عن غضبهن من بعض الذين يقولون "نحن لا نشاهد التليفزيون المصري"..وبراءة الأطفال الذين في سن أبنائهن (أو أحفادهن) في عينيهن..متناسين أنه في عصر السماوات المفتوحة (إكليشيه صفوت الشريف الكلاسيكي) يصير البقاء للأقوى ، القادر على المنح والمنع ، وأن الإعلام الرسمي الرائد (أو الراقد) لم يعد مرعباً كما كانت الدولة البوليسية في مسرحية عادل إمام الأشهر "شاهد ما شافش حاجة"..

صالح كامل وشركاه فعلوها إذن .. وأعتقد أن القائمين على المصايف ومنتجي السينما يدعون للاثنين ليل نهار ، فما كنا لنسمع عن موسم سينمائي ، ولا عن إقبال على المصايف في موسم المونديال الذي يعد على الأقل بالنسبة للوسط السينمائي مثل شهر رمضان تماماً..

لعشاق الكرة : استمتعوا بالمتاح من كرة القدم الحالية ، فغداً سيأتي من يشفرها!

*العنوان مستوحى من أغنية قديمة

16 comments:

Ossama said...

الف مبروك على مصر اعلامها الرائد وانكم ماتتفرجوش على كاس العالم
كويس ان الجمهور لحق كاس افريقيا كانت في مصر والا انت نسيت المرة بتاعة تونس لما كانوا بيذيعوها فرنساوي

وفيها ايه ياقلم لما القهاوي تسترزق والناس تروح تشم هوا يا عم روأ
واتفرج على البيت بيتك مع بسيوني الصغير
على فكرة انا نسيت اقول لك المقال اللي على اسمها ايه نيرفانا وكلامك عن الاستاذ بسيوني الصغير
رائع
قول يا قلم قول
سؤال اخير
انت مقل ليه في الكتابة؟؟خايف تفضى؟؟

قلم جاف said...

لا أبداً..صحيح الحبر بينقص والنفس بتتصد .. بس لما بيظهر موضوع ما .. أي موضوع يخص "فرجة" أو غيرها.. بتبص تلاقي القلم مليان ع الآخر وبينطلق زي الإكسبريس!

Ossama said...

بس المفروض ان طريقتك هنا يا جميل هي المتابعة المستمرة انت بتتكلم عن حاجات صغيرة مهمة وبتكسر في اوثان واصنام الاعلام والميديا وبتعبر بشكل حقيقي عن رغبة عند الناس وبتحقق لهم امل محتاجينه
يبقى مفيش داعي تنصد نفسك
وبعدين ياقلم يا جاف ياريتك كنت قلم رصاص عشان تفضل تكتب متفضاش وتقف
ويبقى مالكش حجة
لا بجد يعني ايه موضوع يظهر دا التلفزيون المصري لوحده كله موضوعات
خد عندك يا سيدي برامج الدكاترة النفسانيين اساتذة الجهل والتهريج على الفضائية المصرية مثلا
وبرامج الآنسة ولا السيدة انجي وبحبك وانا كمان
وبرنامج تفيدة وتامر ولا مفيدة وعامر مين الراجل فينا بتاع المزيكا شيكا بيكا والزيس يعني الفلوس اللي بتندفع عشان تطلع في اي برنامج ابتداءا من برامج المرأة وانتهاءا بصباح مطين بطين على دماغ اللي حيفتح التلفزيون الساعة دي فيك يا مصر
ايه يا قلم
انطلق يا راجل
انا ناوي اعمل دراسة عن مدونات حضرتك يا لا اشتغل

حاجات ومحتاجات said...
This comment has been removed by a blog administrator.
حاجات ومحتاجات said...

الواحد اكتر واحد بيسمعة بيتشتم صالح كامل. الكرة الارضية كلها بتشتم فية تقلش شفر الهوا يخي!
وانهردة استلم الراية مستر الحضري على الجون اللي دخل فية واللي "ميدخلش في عيل في اعدادي" على راي عمرو اديب
لا واتغلبنا كمان يعني قرف من كل ناحية :(


منتظرين تعليق على اعلان نورت مصر هههه

قلم جاف said...

بتقولي "هيشفر الهوا".. يعملها!.. وماستبعدش إنه في يوم حيشتري الشرائط التراثية القديمة اللي سجلها التليفزيون في الستينيات ويحتكر عرضها..

Ossama said...

عزيزي قلم جاف الجميل
صالح كامل اكتر واحد بيتشتم وحيشفر الهوا
وكمان يمكن يشتري الشرايط التراثية ويشفرها
كده يا جميل دخلنا في مؤامرة كونية واصابع خفية
تعالى نناقش الموضوع بهدوء
الشيخ صالح راجل اعمال يعني مش فتحها سبيل ومحطة خيرية ،محطته الخيرية هي الخرائية اللي اسمها اجهل
طيب حيجيب منين عشان عايز يكسب وبيمثل مصالح معينة ؟؟
مش م البنك الوطني في ابوكبير طبعا
لازم يدور على طريقة
الطريقة التشفير ياباشا
يعني ده من وجهة نظر حقه
هو مش الحكومة المصرية ومش راجل البر والاحسان
وعلى فكرة هو نواياه معلنة منذ قديم الازل واللي كان عنده شك فيها زي ما فكرتك بموضوع الدورة الافريقية بتاعة تونس اللي نقلها بالفرنساوي والراجل كبر دماغه ومرفعش قضية بالرغم من انها مضمونة عشان مصالحه في مصر
نقوم نسأل
آدي ام الجمل وآدي ام الجمال ايه اللي ناقص ؟؟
مانتوا يابتوع اعلام الريادة عارفين ميعاد كاس العالم
امال تهريج مصر عايزة تنظمه كان ليه وازاي؟؟
وكمان عارفين تتصلوا بمين بامارة مارحتوا للفيفا وخدتوا على قفاكم
بالرغم من تحذيرات بطرس غالي
وكمان عارفين اللجنة المنظمة بامارة ما طلبتوا تقابلوا الحاج بكنباور وقالكوا معطلكومش

والكلام ده من 4 سنين؟
متفقتوش ليه؟؟
قلم يا جميل
بلاش ننساق خلف التهجيص
اللي لا يودي ولا يجيب وخصوصا ان الاعلام الراقد تحت التراب يكفيه فخر نيرفانا ومنيرفا وجاسمين وابن بسيوني

قلم جاف said...

ويخرج لنا البيه صالح كامل لسانه ويعلن في إعلان مدفوع الأجر بين فواصل البيت بيتك عن نصب سبع شاشات عملاقة لكي يتابع المصريون كأس العالم!

فيك الخخخخخخــــ ير!

Ossama said...

برضه يا قلم انا حعتبر كلامك مش تهكم وتساؤل بجد وخليك معايا
وحاول تشوف بس متخلينيش اقولك انا مش مع صالح كامل ولامع الناس دي
انا عايز اوضح يا جميل ان المشكلة الحقيقية في ان التلفزيون المصري كان عارف ان ده حيحصل ومفيش داعي ننساق خلف المهاترات اللي بيعملها بتوع الارهرام لاغراض في نفسهم
انت جد فخليك جد للآخر
يعني ببساطة يا جميل مرة اخرى كل اللي ذكرته من قبل يدل على ان الراجل حيعمل كده ولا ميدلش؟؟
لو قلت يدل يبقى الغلط مش منه ولازم يتحاسب الناس بتوع التلفزيون
ووزارة الاعلام وده ممكن وبجد وممكن جدا تتعمل حملة على بتوع البرامج الرياضية
لانهم تقاعسوا في صميم شغلهم وفي مسألة قومية وخاصة ان مشاهدة كاس العالم بالنسبة للناس زي شرب الشاي يعني متعة رخيصة وجميلة وحرام نحرمهم منها ولو الحكومة بتفهم لازم تشد ودن الناس اللي تسببت في كده وهم اما مضيعين خالص واما واخدين م الحاج صالح او الاتنين معأ

لو قلت مابيدلش فانا يا عم آسف جدا وآخر مرة اناقشك ويلعن ابو الشيخ صالح في الحالتين

قلم جاف said...

كان فيه اتفاقات تحت الترابيزة بين الشيخ صالح وصفوت الشريف وقت أن كان وزيرا للإعلام..

وفي الحالة دي أنا معاك إن التليفزيون عارف.. بس قرر يبيعنا للشيخ صالح وللحزب .. وافتكر تصريح صفوت الشريف عن الشاشات برضه..

قلم جاف said...

أما فيك الخير فكان المقصود منها الشيخ صالح كامل الذي قدم إعلاناً في التليفزيون المصري نفسه .. زي ما تلاقي مصلحة الضرائب عاملة وبكل ثقة إعلان في صحيفة معروف إنها معارضة بعنف للنظام ، رأس المال يا صديقي بهيلمانه وسلطانه وسلطوته..

Ossama said...

لازم يكون عارف التلفزيون يا جميل
الفيفا في سويسرا واعلاناتها انا اللي ماليش فيها بشوفها كل يوم
والحاج بلاتر قالها صراحة
واللجنة المنظمة في المانيا وسي صالح اللي اسمه كامل بس دقنه ...تقيلة شوية
شفر البطولة الافريقية في تونس2004 الخ الخ
وفيه كلام على تشفير الدوري
وزي مابيقول المثل ان كنتوا نسيتوا اللي جرا هاتوا الدفاتر تنقرا
فمنين مفيش تواطؤ ومنين مش عارفين؟؟؟
ايه اللي انا بقوله ياقلم ياجميل يا اللي اعجابي بيك بيزيد يوم بعد يوم
ان الموضوع ده ممكن بجد يتحول لو الناس حبت الى قضية راي عام و يضرب في بعض الفاسدين المفسدين والناس تتفرج على كاس العالم ولو ان الموضوع متأخر شوية
بس لازم تتم محاولة
واللي انت بتعمله من ضمن المحاولة ديه
وربنا يوفقك

Ossama said...
This comment has been removed by a blog administrator.
قلم جاف said...

توضيح:
النقل الفضائي معروف أنه محتكر من قبل الشيخ صالح كامل..
لكن الكلام على النقل الأرضي..

القصة بدأت لما تخاذل التليفزيون في نقل كاس القارات 1999 .. ومن هنا بدأت الناس تتكلم عن التشفير والاحتكار الكروي..

في كل مرة وبحسب وسائل إعلام متباينة الاتجاهات نسمع عن مفاوضات اللحظة الأخيرة كما حدث في كأس أمم أفريقيا 2002 في مالي..وفي 2004 اتهد حيل ماسبيرو فلجأ للحيلة الفرنساوي..

يقال كان فيه قرار سياسي ورا إذاعة مباريات كاس العالم اللي فاتت أرضي ..

أخيراً.. صدر قرار ملكي بنقل مباريات المونديال أرضي في السعودية.. الأمر الذي وجه لطمة للشيخ صالح كامل!

Malek said...

شوف يا قلم الفيفا قالتها صراحة وياريت تراجع موقعها وتصريحاتها وكمان تصريحات اخوك الحاج بكنباور وهي ان النقل للدول المشاركة مفتوح
النقل لغير المشاركين مطروح على بساط المناقشة اي اللي عايز يدفع ويزايد ويرمي بياضه
النقل مناطقي
يعني هما بيبيعوا منطقة شمال افريقيا والشرق الاوسط والاوشيانية وهكذا
مالهومش دعوة حتاخدوا ارضي حتاخدوا في ايدك معاك حاجة تاخد فيها
الفكرة بتاعة الفرنساوي
كانت ان الكاف باع حقوق النقل العربية
لغة
حصريا للشيخ صالح
وانا اهنيء بتوع التسويق عنده لانها ضربة معلم لاي حد بيفهم انت بتحتكر سلعة ضرورية
وانت يا قلم درست تسويق
فيه احسن من كده؟؟احتكار السكر في مصر مثلا؟؟
نكمل يا جميل
جم بتوع التلفزيون ذاعوا فرنساوي ليه..؟
انا اقولك ليه يا جميل عشان باشوات مصر نكاية في الانجليز خلوا لغة مصر الرسمية التانية هي الفرنسية
وبالتالي لم ننضم للكومنولث
واصبحت مصر فرانكوفون
والمنظمة الفرانكوفونية كانت بتبث لاعضائها
فقلنا عايزين ماشي حيلة يعني
واي محامي بصاغ كان ضربها
وعمل عليها استشكال وخربها
لكن الراجل معملش كده بقرار سياسي
الموضوع مبقاش زي وقتها
والحكاية دلوقت واضحة
في السعودية الموضوع مختلف حيث مازالت الحكاية مش واضحة قوي ومين مع مين ومين ضد مين مظهرتش تماما
ماشي ياقلم ياجميل؟؟؟؟
اسامة

قلم جاف said...

نمسك القصة من وجهة نظر تانية..

قبل قليل شفت ناس في التليفزيون المغربي بتتكلم عن الموضوع دة ، مش كدة وبس ..

قالوا كلام خطير مش عارف مدى صحته : الفيفا معندهوش مانع في البيع الأرضي للمباريات من قبل الشركة المحتكرة (إيه ار طين).. لكن الشركة المحتكرة غلست وحطت شروط تعجيزية.. بل وحتى مع الدول المشتركة نالها من الاحتكار جانب..