Wednesday, July 25, 2007

فرجات آخر الشهر

* أعتقد أن عمرو دياب أذكى من أن يكمل التعامل مع روتاناً يوماً واحداً بعد الآن!

* لمن امتعضوا من ما قاله المخرج الكبير "محمد خان" في "منى زكي" ، وبغض النظر عن "تيمور وشفيقة" ، هل رأينا "منى" أو "أخواتها" من بطلات السينما الحاليات في أدوار شريرة أو مركبة حتى نحكم على قدرتها على أداء مختلف أنواع الأدوار؟ لماذا نتهم الكوميديانات بالنمطية وكأنهم النمطيون الأوحدون في السينما المصرية؟ عجايب!

* يوشك "يوسف معاطي" أن يكون أكبر خطر على نجومية "عادل إمام" من منافسيه!

* لم أرتح نفسياً عندما رأيت "مصطفى بكري" و "عمرو الليثي" ضمن مذيعي برامج قناة "الساعة" الجديدة!

* أتمنى ألا يتحول "أحمد مكي" إلى ممثل محبوس في كاراكتر أقل ما يوصف به بأنه "لمبي الطبقات الراقية"!

* إلى هشام عباس : ألم تكن هناك طريقة أفضل لإعلان عودتك من هذا الكليب؟!

* أوضحت أغنية "نوال الزغبي" الأخيرة بجلاءأن بعض "النجوم" تنكشف قدراتهم الحقيقية بعد أن ينفض المولد المنصوب حولهم!

* أليس من الغريب أن تذيع "دريم" على هامش الاحتفال بذكرى الثورة أغنية "ارمي حمولك عليا" لـ"هيثم شاكر"؟ لقد حصل الرجل على عقابه على ما ارتكب ، فلماذا تذكرنا تلك القناة بما ارتكب؟

* هل يسعى "رامز جلال" لأن يكون "البديل الاقتصادي" لدى المنتجين لـ"أحمد حلمي"؟

* أن تنقل فضائية برنامجاً عن برنامج أجنبي "نقل مسطرة" فهذا أمر معتاد ، لكن أن ترى "روطانا" تقلد في "الاكس فاكتور" برنامج "سوبر ستار" على طريقة الفوتو كوبي ، حتى في "يوميات" البرنامج .. شيء مستفز!

* لكل الناس "غلطة عمر" واحدة ، أما "أنوشكا" فلديها اثنتين كلُ منها ألعن من الأخرى ، الأولى كانت دخولها التمثيل ، والثانية دخولها "اكس فاكتور"!

* كلما أعجب الصحفيين بفيلم ما ، استشعرت أن هذا الفيلم مقلب كبير.. والقطنة مابتكدبش!

* أخيراً .. قرر "القاهرة اليوم" الخلود للراحة طوال الشهر القادم ، أتمنى أن تحذو "برامج أخرى" حذوه!

7 comments:

mai said...

باجي مخصوص عشان اخر فرجات آخر الشهر
:)
اسمحلي يا قلم جاف انا كتبت عن مدونتك كواحدة من المدونات اللي بتتكلم عن السينما والتليفزيون في مجلة جود نيوز.. هينزل ان شاء الله الموضوع في عدد شهر سبتمبر باذن الله
طبعا غني عن الذكر اني ذكرت تحديدا قسم فرجات اخر الشهر
:D
ربنا يوفقك يا فندم

انى راحلة said...

أولا...السلام عليكم...بقالى زمن ماردتش هنا...زى ما أكون كنت فى غيبوبة

أنا متفقة معاك فى معظم النقط اللى ذكرتها...بذات فى موضوع مصطفى بكرى ده...دى هتبقى قناة عجب

بس أنا نفسى يا قلم لما تذكر الصحفيين تحدد بالضبط اى صحفيين بتقصدهم...لأنك بتعمم و ده مش منطقى...و ياريت بجد تذكر أسماء عشان نعرف مين الصحفيين اللى كرهوك فى الصحافة بالشكل ده...

و خارج سياق الموضوع...قريت أخر تصريحات الدكتور على جمعة؟؟؟؟...حضرة المفتى دائما أراءه جدليه بس المرة دى كانت مختلفة أوى...منتظرة رأيك عن الموضوع ده

تحياتى

قلم جاف said...

العزيزة مي :

يشرفني ذلك.. :)

في انتظار تعليقاتك .. وخالص أماني العبد لله لك بكل توفيق..

قلم جاف said...

العزيزة إني راحلة : مرحباً بعد غياب طال..

شوفي ..

لما الفيلم من دول بيطلع تلاقي كونشرتو ، كله طالع في صف واحد يا يقولولك إن الفيلم دة أبدع من فيلليني وإنجمار برجمان (توفي قبل ساعات بالمناسبة) يا إما يقولولك إن دة كارثة وأسوأ من النكسة.. كونشرتو معزوف في كل الصحف المستقلة والحكومية والصفحات الفنية وباستثناءات تتعد على الصوابع..

الإجماع دة يقلق .. ويخلي القارئ يحس إن "العالم دي عاملة رباطية" مع الفيلم أو دونه ، وبيعملوا حالة من "الشبورة" ما تخليش اللي بيتفرج يحكم بشكل صحيح على الفيلم في وقتها ..

لو فيه رأي ورأي آخر .. يمكن كانت العملية اختلفت شوية ، بما إن مفيش فيلم "سوبر" في السنوات الأخيرة يستحق من بعيد إن الناس تجمع عليه رفضاً أو قبولاً..

smraa alnil said...

سالتك قبل كدة بتلاقي وقت لكل دة ازاي
اللهم لا حسد طبعا :)

انى راحلة said...

العزيز قلم جاف...

أنا كان عندى فضول انى أعرف أسماء صحف أو صحفيين و الواقعة اللى بالتحديد خلتك تقول كده

أنا أصلا مش بشترى غير الاهرام و الدستور الاسبوعى و بستبعدهم من الموضوع ده...كنت عايزة أعرف بقية الصحف ايه نظامها عشان انا حاسة انى زى الاطرش فى الزفة

أنا عامة مش بستبعد ده على الصحافة اليومين دول...متهيألى انهم بيلعبوا دور ترويجى زى نجوم اف ام كده و برامج الدش اللى بتروج للفيلم مش بتنقده...و كل فنان بقى و زوقه...و الواقعة اللى ذكرتها أيام المشكلة بتاعة تامر حسنى مع الصحفيين لما صحفية قالت فيما معناه انهم مش هيدعموا تامر بعد المعاملة دى...بتبين انها فعلا محسوبيات

أنا بس تحفظى برضه على التعميم...مينفعش صحفى يقول رأى و صحفى غيره يقول رأى مناقض ليه نرجع نقول ان الصحافة بتناقض نفسها ...مينفعش كل صحفيى مصر يتحطوا فى بوتقة واحدة و يتم ذكرهم ككيان واحد...

انى راحلة said...

و عن قناة الساعة ...أنا جبتها بس المشكلة ان ارسالها ضعيف أوى...يا ترى حد عنده نفس المشكلة؟؟؟؟

كنت شفت احتفال للقناة على قناة المحور و خير اللهم اجعله خير لقيت قذاف الدم ابن القذافى موجود...واضح ان احنا هنشوف العجب

شوف المقالة دى كده
http://www.alquds.co.uk/index.asp?fname=yesterday\03r012c.htm&storytitle=ffويسألونك عن قناة الساعة.. قل الساعة أدهي و أمر!fff&storytitleb=سليم عزوز&storytitlec=