Monday, September 14, 2009

اختبار مسلسلات رمضان 2009!


السؤال الأول : الاختيار من متعدد:

1-من المنتظر أن يعرض الجزء السابع والثلاثين والأخير من مسلسل "تامر وشوقية"...
1-بعد وفاة آخر أبناء حفيد "سعد الدالي"..
2-بعد فوز نادي الترام بدوري أبطال أفريقيا..
3-بعد تولي "شعبان عبد الرحيم" مسئولية اليونسكو..
4-بعد تنحي ابن "سيمبا" عن الحكم..في "شومبونجو"!

2-الاسم المتوقع للمسلسل القادم للمؤلف "محمد صفاء عامر"..
1-ملاهي الشيطان..
2-مراجيح إبليس..
3-العبد والشيطان..
4-عشم إبليس في الجنة..

3-الممثل الذي سيلعب دور العمدة في الجزء الثالث من "المصراوية" هو...
1-أحمد رزق..
2-أحمد عيد..
3-طلعت زكريا..
4-محمد شرف..

4-لماذا تُرِك "خالد جودة" يضع الموسيقى التصويرية لنصف مسلسلات رمضان؟
1-لأنه الموجود دلوقت بعد اختفاء "ياسر عبد الرحمن"..
2-لأنه باين مش مكلف ..
3-لأن موسيقاه في "قصة الأمس" عجبتهم..
4-غتاتة..

السؤال الثاني: علل لما يأتي:

1-وجود سيارة بيجو 504 في مسلسل "حرب الجواسيس" الذي تدور أحداثه سنة 1969..

2-السماح لـ"سامح حسين" بالقيام ببطولة مسلسل "عبودة ماركة مسجلة"..

3-كثرة "حبايب" "أحمد صيام" في مسلسل "حرب الجواسيس"..

4-إصرار "تامر كروان" على التلحين ، واختياره للسيدة "مي فاروق" لغناء تتر "كلام نسوان"..

السؤال الثالث : ماذا تقول لكل من:

1-"نور الشريف" بمناسبة مسلسل "متخافوش"

2-مخرجة مسلسل "تاجر السعادة"

3-"أيمن بهجت قمر" بعد ضربه الرقم القياسي في عدد التترات "المكسورة" التي كتبها..

في انتظار إجاباتكم..
* الصورة كليب آرت من مدونة أجنبية..

8 comments:

احمد بسيونى said...

انا كنت باتابع مسلسل جمال سليمان بنظام حلقة كل خمس ايام و عمر ما فى حاجة ضاعت منى دليل على ان المسلسل ممكن يتعمل سهرة تلفزيونية فى القناة الاولى

وشكرا يا ريس على تدويناك اللى فى الجون

saso said...

كل سنة وانت طيب.
راجل وست ستات بقت لا تطاق والشتيمة طول الوقت في رمزي بقت مزعجة جدا.. تامر وشوقية أهون كتير

خالد جوده رغم التشابة مع ياسر- حتى في الشغل مع حنان ماضي في مسلسلات الهام- بس الحمد لله حبه للنحاس أقل، مبيخضناش ويوقع المعالق من ايدينا، علي الأقل يقسم التورته مع طلعت اللي زهقنا من الدويتو الرهيب مع أيمن بهجت

حرب الجواسيس اللي غلبت العميل 1001 آآآه
مفيش الماني فيكي يا ألمانيا بيتكلم الماني

منه شلبي طول الوقت لابسة بنطلونات -الستينات كان معظمها فساتين أنا أعرف- وبنطلونات ستريت مش شارلستون حتى

في عربية سياحة اسكانيا 2005تقريبا رايح جاي بيها شريف سلامة

سؤال يا قلم هو ليه الاسرائيلين في كل المسلسلات الحديثة -بئر سبع والعميل وحرب الجواسيس- بيحبوا الضلمة زي عنيهم أنا اتهريت شموع وأباليك

نور الشريف فكرني بعادل امام "البطل مات والبطلة ماتت وعمته ماتت وعندما عرض الفيلم مات المشاهدون جميعا" كل مشوف حلقة آلقاهم بيموتوا بالجوز واللي ما ماتوش راقدين في المستشفي وبيموتوا

Ramez said...

بجد اختلف معاك تماماً على تامر كراون.. ده فعلاً من أحسن الملحنين اللي شافتهم السينما و التليفزيون.. إنت سمعت مجنون ليلى؟؟ سمعتله حاجة تانية؟ بجد مش فاهمك المرة دي!

قلم جاف said...

كل عام الجميع بخير ..

رامز :

يبقى أكيد ما سمعتهوش في "كلام نسوان".. جمله تغيظ .. وبيفكر على طريقة حط موسيقى على الكلام ، حاجة تشبه "المزجنجي" في فيلم الكيف!

قلم جاف said...

العزيزة ساسو :

1-"راجل وست ستات" لجأ للسوقية للإضحاك بعد أن غلب حمار صناعه ، "تامر وشوقية" قائم أساساً على السوقية!

2-"خالد جودة" : لا وانتي الصادقة ، الاتنين بيقسموا علينا .. اتنين عديمي الموهبة رزئنا بيهم مؤخراً ، وما خففش من وطء موسيقاهم إلا "عمرو إسماعيل" المتألق جداً في "ليالي"..

3-"حرب الجواسيس" : شفتي تليفزيونات الستينات اللي في المسلسل؟.. أمال "الصندوق" الله يرحمه اللي عند خالاتي دة موديل سنة كام؟

4-ضعف الإضاءة في مشاهد الموساد : دة يرجع لكون المؤلف يؤمن بأن الموساد يعمل في صمت!

5-"متخافوش" : طلع كلام "الشروق" صح .. المسلسل حيخلص حيخلص وأديه خلص امبارح ، وتقريباً من اللي شفته من الحلقة الأخيرة مفيش حد مات والحمد لله..

قلم جاف said...

بسيوني :

واخد لي بالك : حفيده ضاع أول امبارح ، بيستريح امبارح ، بيخطط علشان ياخده النهاردة ، حينفذ بكرة ، وحيقتل نص العيلة التانية بعد بكرة .. حاجة كدة نظام "فاضي ولا وراك حاجة؟"..

أنا شخصياً مش معجب باختيار "جمال سليمان" للدور ، كان رأيي بجملة لما يعوزوا كدة واحد إبليس يمسك البلد يجيبوا "فاروق الفيشاوي" في "الدم والنار"!

"محمد صفاء عامر" أصبح عنواناً للملل في كل رمضان..

قـنـديـل said...

قلم جاف ..
أسئلة منطقية جداً .. و اللي محيرني أوي هو خالد جودة !
معقول الاستنساخ يوصل لحد كده ؟؟
أما محمد صفاء عامر فواضح إن الشيطان لاعب في دماغه و مفهمه إنه أعظم مؤلف مسلسلات !
أما نور الشريف أحب اقول له بمناسبة مسلسل ماتخافوش : حصل لنا الرعب يا سيدي !
لكني مش متفق معاك بخصوص " سامح حسين " هو مسلسل عبودة سطحي و فيه كم كبير من السذاجة و إخراجه سيئ لكن أداء سامح جيد و فيه تلقائية افقتدناها دلوقتي .. و بصراحة واضح انه موهوب و منتظر منه كتير بس يركز في اختياراته ، و بالمناسبة عجبني في " القبطان عزوز " مسلسل كرتون معمول كويس

كل رمضان و انت و الجميع بخير
، و عيد سعيد
سلام

خواطر شابة said...

اردت فقط ان اهنئك بمناسبة العيد واتمنى لك عيدا سعيدا انت وجميع احبائك
اما عن التلفزيون فالحمد لله الدي هداني هده السنة الى مقاطعته خلال شهر رمضان والان امامي السنة كاملة ان كان لي عمر لمتابعة كل هده الاعمال واكيد ساستفيد من ملاحظاتك في اختياراتي
مع تحياتي