Tuesday, August 08, 2006

سي الفاصل!


أعترف أنه ما زال يخالجني - حلوة دي - نفس الشعور بأن لنا الريادة في مصر على العالم العربي كله ، ولكن في الهراء والكلام الفارغ..

علمتنا الفضائيات عبارة "نلتقي بعد الفاصل".. والفاصل ، وليصححني المحترفون منكم إن أخطأت ، هو الفاصل الإعلاني ، إما أنه يحتوي على إعلانات تجارية ، أو إعلانات وتنويهات عن برامج لنفس القناة أو شقيقاتها (إن كانت القناة ضمن مؤسسة) ، أو حتى توعيات من عينة إدوا ضهركم للترعة .. والفواصل تأتي في أي توقيت يرتضيه أصحاب أو مديرو القناة ، حتى في نشرات الأخبار في كل قنوات العالم هناك فواصل إعلانية تجارية ، وقد حاول التليفزيون الفلافيوزي ذلك أول الأمر .. إلى أن..

إلى أن كتب عبد السلام النادي رئيس التليفزيون المصري الأسبق في الأهرام قبل سنوات ، مؤكداً أنه شاهد في الفضائيات العالمية (وكأنه الوحيد الذي يشاهدها) أنه لا إعلانات في الفواصل بين نشرات الأخبار ، وعلى الفور عمل المسئولون بالتليفزيون الريادي الفلافيوزي بتلك النصيحة الفصيحة .. ومع الوقت "تبلور" المفهوم الإعلامي المصري لكلمة "فاصل"..

وطبقاً للمفاهيم الفهلوية المهلبية ، فالفاصل إما أنه مجرد ظهور شعار البرنامج ودمتم .. فاصل جميل عمره لا يتجاوز الثواني الثلاث!.. أو أنه على طريقة شريف أحمد سمير ، المخرج الملاكي لبرامج الست شافكي المنيري ، تقرير أو تحقيق أو لقطات .. هذا هو الفاصل كما يراه سيادته لا فض فوه ووقع من كوبري طلخا حاسدوه !

وسرعان ما انتشر هذا الهراء كالنار في الهشيم ، ووصلت رائحته الفائحة لقنوات عربية ،وفي برامج شهيرة ..

الرياليون - من الريالة - كائنات بيروقراطية تحتكر الذكاء لنفسها ، وإن رأت شيئاً جديداً تقلده ولا تتعلمه ، وتضع عليه "أشياء غريبة" تعتقد أنها لمساتها الخاصة حتى ولو شوهت الأصل الغربي أو العربي..

مش كدة؟ ولا أقول لكم .. ألتقيكم بعد الفاصل.. حاجة ساقعة بيبسسسسس!

8 comments:

Ossama said...

شوف يا قلم يا جاف اصل الفاصل المنيل بنيلة هو الفاصل الاعلاني في القنوات التلفزيونية الامريكية منذ بجاية البث التلفزيوني هناك اي من قبل حرب المعيز التي يبدو ان الاخ عبد السلام الكلوب السلطاني كان مراسلا حربيا فيها ولم يعرف معنى الفاصل
الفاصل الاعلاني في اي برنامج بيتفرج الناس على امه .ليه الفاصل عشان ام البرامج اللي الناس بتتفرج عليها بتمولها شركات مش بيصرف عليها المواطنون زي حضرتك ومش ميغة ولا انجر فتة زي ماسبيرو اللي انت حاطط صورته لتشرفنا
يعني الفاصل ده من فلوس المعلنين يعني المعادلة هي احنا بنعمل برنامج او سيت كوم او نشرة حتى وبنصرف عليها وانتوا بتتفرجوا فجزء من تمن الفرجة ان حضراتم تتفرجوا على اعلانتنا
بس احنا برضه بنحترمكم (اصل دي ام بلاد فوضى اهلها محترمين مش زينا بلاد منظمة واهلها ملهمش رأي)وعشان كده لازم بقوة القانون ننوه عن الفاصل الاعلاني
وطبعا الكلام ده موجود في ام اي كتاب اعلامي
بس يا قلم لازم تشوف الكتب اللي بيدرسوها للشباب سواء في كلية الاعلام وهي احسن شوية في قوة الجهل او في اكاديمية اكتوبر اللي هي غاية المراد من رب العباد في الجهل والتجهيل
سيبك يا شريف انت محصلتش زي ما بقولك كل مرة

Yasser_best said...

أحسنت
واعلم يا عزيزي أن ما قلته وأضاف إليه الصديق الفاهم أسامة يكشف عن حالة العجز في مقبرة ماسبيرو عن فهم أبسط مباديء العمل التلفزيوني
الفاصل هو بالفعل تنويه إما عن إعلان تجاري يساهم في تمويل القناة أو عن تنويه عن برنامج أو عمل تلفزيوني ترى القناة أنه يستحق المتابعة.. وفي بعض الأحيان قد يكون الفاصل فرصة للتنويه عن القناة نفسها
الفاصل الإعلاني أو ال break كما يسميه بعض أهل المهنة, له أهداف عدة, أولها العامل التجاري كما تعلم, وكذلك قد يستخدم للفصل وتقسيم النشرات إلى أجزاء ومحاور وموضوعات تجنباً للإطالة وحرصاً على عدم إصابة المشاهد بالملل
ملاحظة مهمة.. ولكن من يقرأ ومن يسمع يا عزيزي؟!

وله نهايه said...

بعد الفاصل خراب ديار وتشتيت للافكار

Ossama said...

على فكرة زي ما اضاف اخونا الدكتور الاعلامي الكبير ياسر
الفاصل ممكن يكون تنويه عن القناة او البرامج
بس عارفين ليه حصل التطور ده؟
لاستقرار الفاصل اساسا كجزء لا يتجزء من البرامج لجلب الاعلانات(قنوات الكابل لا توجد بها فواصل)و عند عدموجود اعلانات كافية القناة تعلن عن نفسها او برامجها
الاعلان هو الاصل زي كوكا كولا كده
بس ناس من ايام حرب المعيز تعرف كده ازاي؟؟

soosa el-mafroosa said...

هاي أنا أول مرة آجي هنا بس و الله جميل

ساعات الفواصل الإعلانية دي بتبقى آخر مسخرة ..يعني برنامج يدعوا للمقاطعه تلاقي وراه إعلان لكينتاكي
أو برنامج لطارق علام فيه واحد مش لاقي ياكل وراه إعلان لقرية سياحية ..و سلملي ع التنسيق

زمان الوصل said...

إيه اللى مزعّلك من الفاصل يا شريف !! لم استطع ان اضع يدى على اللى مزعّلك منه !! شاور لى بس على اللى مزعّلك و انا اتفاهم معاه ..

قلم جاف said...

اللي مزعلني هو الطريقة السبهللية الفلافيوزية الفقيعة اللي بيتطبق بيها الأسلوب دة .. والأسوأ العبارة العجيبة الشافكية المنيرية دي : نشوف فاصل !

في البي بي سي الفاصل يتشاف على حق ، فيه لقطات من البرامج بمواعيدها بشكل بسيط خالي من الفذلكة ، وإن ما كانش بيجيبوا في سطور مختصرة خريطة البرامج لليوم ، أو حدث في مثل هذا اليوم ، وستوب ووتش تحت لفترة الفاصل ، يعني انت بتتفرج على فاصل حيقعد دقيقتين بالثانية ، والنشرات بتبدأ بالثانية (زي ما موبينيل عايزة تحاسبنا بالثانية)..

ليه الناس عايزة تقلد وتفتي من غير ما تتعلم؟ وهل معنى إن إحنا "تاني" أقدم تليفزيون في المنطقة إن احنا ما نتعلمش؟..

so7ab said...

الازمة كمان فى اختيار اوقات الفواصل من المفترض ان الفواصل بتيجى علشان كمان تعمل حلة من التشويق . التشويق ده الى لو حتى فى الفاصل اعلان مرغم تشوفه علشان ميفوتكش حاجة اما من الااس برامجنا مملة جدا وحالة عالية من الكدب الاستعباط ويزودوها بفواصل غريبة هطل بعيد عنك تمل ايه

ولنا الله نحن المشاهدين