Saturday, April 11, 2009

بربك الأعلى لا تفعليها


صحيح أن إلغاء "نادي السينما" كان بمثابة رصاصة الرحمة لتاريخ البرنامج الذي قدمته "درية شرف الدين" ، لكن انتقال "درية شرف الدين" إلى "دريم" -إن صح- هو بمثابة رصاصة قتل لتاريخ "درية شرف الدين" نفسها..

أتفهم رغبة "درية شرف الدين" في الدخول في تحد جديد ينسيها وينسينا مرارة إلغاء "نادي السينما" ، ولكني أجد صعوبة في تفهم فكرة أن يكون الظلم مبرراً للانتحار .. وعمل إعلامية بتاريخ وقيمة "درية شرف الدين" في قناة مثل "دريم" هو أسوأ صور الانتحار.. لا يمكن أن نقبل بعد كل هذه السنوات التي تعلقنا فيها ببرنامجٍ راقٍ أن ينتهي الأمر بمذيعته في "دريم" التي تمثل يخنة التهييج والإتجار السياسي والديني والإسفاف المهني .. لا يمكن أن نقبل أن نرى "درية شرف الدين" التي تذكرنا بالقلة المحترمة في ماسبيرو سواء من عاصروها أو من جاءوا بعدها وهي تعمل تحت سقف واحد مع "البريمادونا" و"جيم كاري" و"د. سيليكون" في قناة تشبه مسرح المابيت شو..

آمل فقط أن يكون ما تردد عن انتقال "درية شرف الدين" هي مجرد "زعبرة" صحفية .. "دريم" ليست مقامك عزيزتنا الإعلامية الكبيرة..
* الصورة من أخبار اليوم وسبق استخدامها في تدوينة سابقة..فضلتُ الاستسهال! :)

5 comments:

زمان الوصل said...

لا أعتقد أنّها ستتلقّى عرضا حقيقيا .. خلال الحلقه التى استضافت "دريه شرف الدين" من برنامج "العاشره مساء" اتّصل مدير البرامج بالقناه عارضا على "دريه" تقديم البرنامج على "دريم"

طريقة العرض التى لا علاقه لها بالاحترافيه تشى أنّه كان كلام للشهره و التهجيص لا أكثر ولا أقل فعروض العمل الحقيقيه لا تَجرى بهذه الطريقه و هناك سابقه ذكرها "حمدى قنديل" أنّه عُرَض عليه شئ مماثل من "أحمد بهجت" لكن لم يتم الأمر .. فاطمئن و اهدأ بالا
:)

blackcairorose said...

فرجة

بقى بتوصف دريم على انها يخنة التهييج والإتجار السياسي والديني والإسفاف المهني

طيب بس الله يخليك قولي ـ ده لو لقيت وصف صحيح ـ تليفزيون ما سبيرو يبقى ايه؟؟ واللي بيشتغلوا فيه يبقوا ايه؟ وايه الفرق بين العاملين في ماسيببرو وبين الموظفين في أي وزارة او مصلحة مصرية معشش في نافوخهم البيروقراطية والروتين والجهل وعدم الرغبة فى المعرفة او التطوير وعدم الدراية باللي بيحصل في العالم المتقدم، وطبعا مش هتكلم عن الموضوعية والحرفية وهامش الحرية لأن دي اختراعات لسه مستوعبوهاش

وياريت على كده، ده موظفين وزارة التموين عندي انا ارحم من موظفين وقيادات ماسبيرو اللي مع تخلفهم الازلي عندهم جراءة او وقاحة فى الادعاء بانهم رواد الاعلام واصحاب مدرسة اعلامية وان العالم بينتظر اللي بيعملوه علشان يقلدهم وينبهر بيهم زي الست اللي كانت ماسكة القناة العرجاء اللي اسمها النيل للاخبار وبتقولك انها اكثر حرفية وتطوير وموضوعية من قناة الجزيرة

القيادات اللي عمرها ما سمعت ولا كانت هتسمع عن حاجة اسمها برامج مسابقات تقعد الملايين من المشاهدين متسمرين يتفرجوا عليها، وعمرها ما سمعت عن حاجة اسمها تليفزيون الواقع غزت اوروبا وامريكا من اكتر من عشر سنين وووو

مش دفاع عن دريم لأني اساسا مش متابعاها كويس، ولكن اللي يقول ان فيه حد هيخسر لأنه ساب ماسيبرو بالنسبة لي رأي مليون المية خاطىءلأني بشوف أن أي قناة خاصة أفضل من قنوات ماسيبرو الحكومية

وتحياتي

معلش للحمئة بس بصراحة ماسيبرو باللي فيه عايزين جاز وكبريت!!!!
لأن الاسوأ من الجهل ومن عدم الحرفية انه يصاحبهم غرور وادعاء

قلم جاف said...

العزيزة بلاك كايرو روز:

ماسبيرو دوره جاي بعدين .. السنة اللي جاية الذكرى الخمسين لانطلاق التليفزيون المصري .. ومحضر ع الهامش كام فكرة حلوين على طريقتي الخاصة لوصف حالة الهلهلة اللي بيعاني منها ماسبيرو منذ سنوات طويلة..

لكن ماسبيرو إن راح ولا جه شوية بيروقراط ، زيهم زي اللي في المركز القومي للبحوث زيهم زي اللي في الجهاز المركزي للمحاسبات زيهم زي ناس كتير في أماكن كتير.. فيه من البيروقراط من أبصر قدامه طريقاً فمشى فيه .. بكالوريوس زراعة على ليسانس حقوق على بكالوريوس تجارة على معهد فني صناعي على بكالوريوس إعلام وهوبا ها بيلاقي نفسه شغال في الميديا.. وشوفي وتخيلي بقى إزاي بيبقى شكل مكان مطالب فيه الموظف بعمل احترافي في الوقت اللي هوة فيه هاوي.. مش هاوي بمعنى الهاوي الغاوي اللي بيحب الحاجة وعايز يدرسها ويتفوق فيها ، لأ.. الهاوي بمعناها التاني الغمارة والسذاجة ونقص الخبرة..

النوع دة من الناس خصوصاً في الميديا عامل زي العروسة اللي تهزيها تقول بابا وتهزيها تاني تقول ماما.. ومش ممكن تخرج عن التصرفين دول.. الحزب بيهز العروسة تقول بابا ويهزها تاني تقول ماما ويهزها تالت تقول سيمبا ويهزها رابع تقول فخريار..

لكن على دريم القصة تختلف..

كيان هادف للربح يفترض بيه إنه بيجيب ناس "محترفين".. كيان بيدعي وبيزعم إنه لسان الناس وبيستدر تعاطفهم بالمواقف السياسية والاقتصادية لطيهم تحت جناح مصالحه.. اللي بتقتضي المتاجرة بكل شيء ، سياسةً وديناً ووطناً كمان..

اللي شغال في وكالة من غير بواب مايهمهوش لا ربح ولا خسارة .. وبالتالي من جواه مبيحسش بأهمية اللي بيعمله .. عمل ما عملش بياخد مرتبه آخر الشهر .. أما اللي شغال في بيزنس فيفترض بيه تأدية عمله باحترافية وذمة وضمير واحترام للمعايير..

وهو ما لا أراه بعيني المجردتين في دريم..

قلم جاف said...

العزيزة زمان الوصل:

"حمدي قنديل" اشتغل لفترة قصيرة مع "دريم" قبل ما ينقل على دبي وقبل ما يفركش منها..

أزيدك من الشعر بيت .. فيه كلام إن المحور فاتحة خطوط اتصال مع "درية شرف الدين".. لكن عرض المحور ماهواش جدي..

أنا معاكي في إن الحركة اللي اتعملت في دريم حركة انتهازية مش أكثر .. كما إن فرصتها حتكون ضعيفة موت لو قدمت برنامج بعد ما دخل "عمرو الليثي" ع الخط وقدم له برنامج اسمه "واحد م الناس"..

ثقتي كبيرة في ذكاء "درية شرف الدين".. إلا إذا كانت لها ميول انتحارية تجعلها تقبل العمل في قناة مثل "دريم"!

Defa said...

بدعوك إلى هنا
http://www.e7twa.com/vb/index.php